開心又係mouse ~唔開心又係mouse

俾貓玩番轉頭

今日工作多到乜咁
做完哂食左個午餐就走去左haircut
今次冇打電話去booking, 所以要等好鬼耐
冇問題啦~撗掂同老闆都好鬼熟~咪睇住電影等下羅(次次都有新戲睇,好鬼o岩我)
順手又同佢三隻肥貓玩下(一間salon可以養三隻貓而又俾佢地通到跑~真係冇得頂)

一坐低,阿大已經走個黎喵下我~又跳上我到打招呼
咪抱下佢羅~點知阿二同阿細又跳埋個黎~~
嘩~一個麻甩佬坐係梳化到左擁右抱幾爽呀~
三隻肥嘟嘟既貓就係咁陪我睇電影
一睇就睇左兩個幾鐘....

正當到我修理頭髮既時候...Booooooo 一聲.......屁味????
原來貓真係會放屁架!!!!! 好鬼臭....近距離攻擊呀~~~~~~~~~
三隻衰野即刻飛閃哂 !
之後Terry就係咁笑我 ~佢話養左5年都未試過咁勁~
妖~
攪到我未剪就要用風筒吹身先
仲俾隔離個妹妹仔陰陰咀咁笑

估唔到連貓都黎整鬼我~
阿細, 小心下次抱住你就到我放! 睇住黎~ 報仇咁報 !

傷口

經歷過多少個風雨也好
幾多疤痕傷口也好
可以
讓我一一為你貼上膠布療傷嗎?
順手幫我貼埋
OK ?

攪珠日期 : 24/11/2009(星期二)

7.21.24.33.35.45+26

中啦~中個7字~!!!
Yeah

期待

今日病到暈暈下
好耐冇試過咁病法
可能真係屈得太耐,一下子爆哂出黎

一個人係家其實都幾孤獨
雖然我呢三年都習慣左呢種感覺
但總期待有人關心一下
一個電話或SMS已經可以足夠令我開心一整日

今日我都收到一個SMS
不過係男人黎....SHIT !

WHY ME ? 點解要令我咁失望
樣衰 !!

병

결국 병이 나는 고민을 얻었는가?
역시 나는 정말로 과도에 지칩니다

夢一場

倒帶 (5)

人會有迷失既時候
我可以好懶
真的
我之前用左九個月時間體驗人生
唔工作,但不停睇書,觀察好多唔同人既人性
用盡先前既儲蓄
先再工作

2002年我轉了行, 都係電腦,但係做sales
因為科網股爆左之後,寫程式係搵唔到食既,因為唔多公司請人
我係一個機會下認識了我第二個女朋友-- Anthea
佢一直同我到2009年
真的感謝你,我們過度了近7個年頭
本來以為可以長相斯守的,但或者中途條路行歪了
我已經唔係你杯茶
感謝你為我呢件垃圾照亮過

2009年
依家工作ok ,學人做左管理層
又傻傻下挨到個學位
家人呢, 健康問題等等都還可以啦

人生過了三十年多年
似乎未找到一個喜歡自己的伴侶或就真係有一點可笑
或者我真係樣衰吧
身邊朋友大都結哂婚, 有埋小朋友
我呢
身邊有好多女性走來走去,尤其知道我甩拖後
但我明白愛情唔係遊戲,唔係show
我要既係長途伴侶
但我要既茶偏偏未預備好

感謝朋友們呢幾個月既精神支持
我可以的,放心吧
I'm not smart, But I really know whats Love is

只要我改變自己

p.s. 2010年我要置業,擁有真正另一個世界 !

倒帶 (4)

開始畢業後打第一份長工
真的
好辛苦
我要比其他人學更多,我學懂了唔捉住機會就可能冇第二次
我左姆指亦因此受了刀傷,跟我一世
但當我氣餒既時候睇返呢條刀痕,就會覺得有咩過唔到,再辛苦時刻都過得到啦

同期,爸回家
因為生意失敗,二奶走了
但媽原諒佢,好偉大
再一次一家人(可笑)

阿妹入大學了, 好叻,真係好叻女,比阿哥叻多好倍
我要搵更多錢,我要照顧佢地
我開始學電腦,再次進修

1998年,電腦既資訊年代,搵錢真係好易
尤其我呢D寫程式既人員
我開始第一次拍拖
佢叫Mandy,一個好活潑好動既女仔
佢教識我好多男女之間的事
亦令我見識了呢個玩樂既世界
亦學識了何謂背叛
何謂愛情
我記得佢同我講我會係一個好老公
但一定唔係佢想要既男朋友
因為我太好

之後,我們分開了

倒帶 (3)

我細路已經會將心事放係心到
因為我知道只有自己先可以解決到,冇人幫到我
因為我清楚我自己
我自痺

過左一年多,入到公屋住,再一次重生
亦因為杜議員幫助

我係幼稚園好叻,中班同高班都係全級第一
我熟背了我人生第一個英文名詞 : elephant

爸爸開始再建立自己既生意---紡織公司
小學時候
連續六年我都全級頭三名之內
田徑隊隊長加風紀大隊長
但當同學們放學返屋企睇430穿梭機既時候,我同阿妹放左學就係返工廠
食飯做功課全部係個到
仲要幫手剪毛片 (所以家下D衫我羅上手就知OK OR NOT, 真係浸返黎)
但從來我都唔敢同身邊朋友仔提起過,我怕,我怕他們的眼光

順利地我入了個BAND 1男校中學 -- 觀塘瑪利諾書院
同年,我們搬了新屋,一切似乎美好
但新屋只有兩個房間,阿妹又開始大個了,需要一個空間
我讓了她,我訓梳化床,一直到而家,我放棄了自己的空間

中二當年,家變,我爸有錢了,包二奶
我討厭將愛情變做遊戲
我開始放棄自己 ,吸了第一口煙,唔讀書,放學踢波
每日只係見到家人哭哭啼啼
我同開始同爸口角,之後打架
之後兩年,佢冇出現個,家中負擔就交由媽一個人
我開始做兼職幫家,我唔要媽辛苦
我唔要讀書,即使我讀到都冇用,因為家中真係要一個男人
機會就交俾妹妹吧

中三因為成績差, 中四個年要轉校
我開始見番女性同學,好唔習慣
繼續堅持兼職幫家,唯一發洩精力既地方就係踢波
只有球場俾到成功感我

青春時期,我唔喜歡照相片
我討厭個個時間
我唔要有個段回憶

倒帶 (2)

火燭
真的一把火將整個藍田木屋區既山頭燒哂
一夜之間
我們的家,財產, 爸媽的努力燒盡.............乜都冇哂
爸爸亦因為保護我地腳受了傷
當年我四歲

因為當時好多人無家可歸,政府係藍田足球場安排左派飯同領毛氈物品
媽媽要照顧兩歲既妹妹,爸爸又行唔到,阿叔就帶住我去領物品
一個人仔細細, 又嚇到下,我竟然一句都無喊到, 真係一句都冇(反而我阿妹就嚇到係咁喊)
仲好勇咁羅D好涷既飯菜俾家人, 我諗我真真係整定要背起頭家

之後因為冇屋住,政府安排左我地去住難民營
你冇睇錯,係難●民●營●
即係個時收容越南難民個D地方 (依家近九龍灣麗晶花園個頭,好似改建左個咩教會中心個到)
所以我細細已經懂得同越南仔打交,因為我要保護我阿妹
冇書讀冇錢,一家人困係一張LOOK架床到,所有財產就只有爸爸係火海搬到幾多得幾多既衣物
父母講書唔多,但點好想我同阿妹點都返到幼稚園
所以就去左附近學校睇下有冇機會
其中一間,我好記得個MISS考左我一個入學問題 :
"小朋友,你知道咩係大笨象嗎 ? 可以話我知大笨象英文點讀呀 ?"
人生第一次無言
我記得媽媽為我哭,哭得好勁,但我強忍,我要保護媽媽

我之後都讀到入到,因為有區議員幫手,個個恩人叫杜葉鍚恩
我感謝她,永世

倒帶 (1)

一直都好想寫一個真正自己既故事
一直都無勇氣寫出來
怕面對自己的回憶
今日哭了,多謝家狼陪住我,讓我可以安心咁放聲痛哭一大場,好樣衰
我既故事開始吧
-----------------------------------------------
我
生於一九七六年十二月二十八日
一個極寒冷既冬天
跟據亞媽講,我出世之前,家中真係窮到三餐都不繼
但亞爸好努力咁為家付出
係藍田山頭找了一個地方,一手一腳親手咁起左一間木屋,成為左我地第一個家
一邊係一個極簡陋既聽(或放床既地方),另一邊就係放左兩部紡織機既工作坊
佢兩個以前係同一間工廠工作所認識,之後就相愛結婚
個時基本每個香港人都有一份好利害既堅韌力
只要唔放棄就一定找到吃
亞媽話我係肚個陣,真係一日都唔知有冇兩餐落肚,一來要搵食,二來家中真係錢都唔多個
出到世已經係奇蹟
亞爸話, 亞爺後生係一個二世祖,係鄉下個陣有田有地,錢又多,男人就係咁,所以佢有兩個老婆
我亞麻就係做細個個, 之後打仗就同亞爺落左黎香港,大麻就一個人孤苦咁留係鄉下帶住四個仔女
一個人風流加好賭真係會害到家人,亞爺就係好人辦
落左黎香港之後就係咁賭,乜錢都輸Q哂,亞爸話都唔知幾多次見佢輸到底褲都冇咁返屋企
又成日飲醉
所以我細細個已經有一個家訓 :唔好可以賭錢
好彩,我天生比較蠢,計數呢家野真係幾難到我,所以我對賭真係冇天份亦冇興趣
我係廣華醫院出世
成為左張家第一個長男孫
整個童年最開心我諗真係得個三年
每日可以通山跑,又識爬蕉樹偷香蕉(依家家族聚會時,五伯伯間中都會記起講下)
但之後既日子
就係我人生30年既無限挑戰既揭幕.....................

攪珠日期 : 21/11/2009(星期六)

2.8.23.28.38.45+21

妖.............

당신입니다

나에게 당신을 보호하게 합니다

攪珠日期 : 19/11/2009(星期四)

11.13.19.35.41.45+24

都係........
我諗係下次係開之前請亞司徒法正師父作下法先得